Detaje të reja janë zbuluar nga atentati ndaj dy shqiptarëve në Greqi, Kreshnik Çerçizaj dhe Armando Ogranaja.
Raporti mjekoligjor i dy viktimave që u qëlluan për vdekje mbrëmjen e së dielës (18 dhjetor) brenda një lokali pritet të dalë sot. Ndërkohë policia, duke analizuar lëvizjet e autorit në video, ka deklaruar se bëhet fjalë për një të ri, i cili është arratisur me ndihmën e bashkëpunëtorëve të tij.
Mënyra e veprimit të tij, konsiderohet si shfaqje pushteti dhe demostrim force.
Objektivi i atentatit mësohet se ishte Kreshnik Çerçizaj, i cili mori dy plumba në kokë.
41-vjeçari ishte liruar nga burgjet e Korydallos në vitin 2005. Në vitin 2008 u arrestua sërish për vjedhje, ndërsa në vitin 2012 u akuzua për grabitje në Janinë.
Katër vite më vonë ai u arrestua sërish, pas zbulimit të një plantacioni hashashi në Korint. Ai ishte liruar me kusht dhe i ndalohej të largohej nga vendi.
Ndërsa 44-vjeçari, i cili u qëllua me plumb në bark dhe kraharor, ishte akuzuar për armëmbajtje pa leje dhe veprën e paligjshme të lojërave të fatit.
Në hetim është e shkuara e tij, si edhe po kontrollohen kontaktet e 41-vjeçarit, pasi dyshohet se bëhet fjalë për një larje hesapesh, në kuadrin e mafias shqiptare.